Намрын наран над дээр чам дээр ээж, налгар сайхан өдрүүд үргэлжилж байна. Энэ сайхан өдрүүдийг халж нэг л өдөр хүйтэн жавар тачигнан шуурч хорвоо дэлхий цасан өмсгөлөө өмсөх нь дамжиггүй. Бид ч яахав, бэлэн хувцаснуудаа шүүгээнээсээ гаргаж ирээд өмсчихнө. Харин өмсөх хувцас байтугай хоногийн хоолоо арайхийн аргацаадаг гудамж траншейны гэх орон гэргүй хүмүүст энэ нь маш хүндээр тусах нь ойлгомжтой. Адилхан мах цусанд төрсөн бид л биесээ ойлгож, дэмжиж, бага ч атугай зүйлээр туслахгүй бол яах сан билээ. Энэ ч үүднээс Үүрээ, Номин 2 санаачлан, орон гэргүй хүмүүст зориулж хуучин хувцас цуглуулах ажлыг эхлүүлээд байна.
Монголын өвөл ямархан хатуу ширүүн болдгийг мэдэх гадныхан энэ ажлыг дуртайяа дэмжиж өөрсдийн хэрэглэж байсан хуучин хувцас хэрэглэлээ сэтгэл харамгүй бэлэглэн үлдээдэг нь талархууштай. Санаа сайн бол заяа сайн гэдэг шүү дээ. Та бүхнийг ч мөн энэхүү сайхан үйлсэд нэгдэн, боломжоороо илүүдэл/хуучин хувцас хэрэглэлээсээ хандивлах байх аа хэмээн итгэж байна. Хэрэв танд илүүдэл хувцас хэрэглэл байхгүй бол өөрийн боломжоороо бага гэлтгүй мөнгө хандивлаж болно. Бид таны мөнгөөр захаас хуучин ч гэлээ чанартай ороолт, бээлий, малгай, гутал, ноосон цамц зэргийг худалдан авч гудамжинд даарч чичрэн суугаа бяцхан хүү, хөгшин настан, ядарсан нэгэнд бэлэглэн бага ч гэсэн сэтгэлийн гэрэл гэгээ хайрлахыг хичээх болно. Та бүхэнд маш их баярлалаа.
Бидэнтэй нэгдэх утас: 99044317, 99730703
и-мэйл хаяг: uuree_anh@yahoo.com, nomin17@yahoo.com
Хүндэтгэн ёсолсон
Uuree & Nomin
Tа бүхнийг энэхүү мэдээний холбоосыг бусдад тараах буюу yms статустаа хэсэг ч болов хугацаагаар оруулахыг урайлж байна.
Сайн үйлс бүхэн дэлгэрэх болтугай!
гэнээ. Хувь нэмэрээ жоохон ч гэсэн оруулах үүднээс блогтоо тавьж байна.
No comments:
Post a Comment